Lempeng Ubi + Kupi O..

Hujan - Rezeki atau Bencana?

Cubo bayangkan... hari potang, tetibo lak hujan. Lopeh tu tengahaghi eh tadi tak makan pulak. Diet konon eh.  Poghut dah mulo mengiramakan lagu keroncong... Tetibo teghingat lak ubi kayu yang den ambik kek umah abah den minggu lopeh.. Teghingin bonar lak nak makan lempeng ubi. Hujan-hujan ni, copek bonar kombang pusat. Lapar!  Kobotulan, den ado boli kupi mesin kek Pokan Salak. Laa hai.. elok bonar kalau dijuduan tu... Hah, apo kato kau? Camano nak dibuek an tu.. Nampak gayo kono la buek an jugak lempeng ubi ni. Jom!!

Mulo-mulo kono la ado ubi kayu.. Bukan ubi kontang atau keledek. Tak maun deh ... Yang tu, lain post kito ceghito yo.. Ni nak buek lempeng ubi kayu, paham tak?.. Ponek tau tak, mencabut eh minggu lopeh. Sampai tekontut-kontut. Nasib abah den tolong... Tolong tengok yo..  Lopeh tu, kono la ado gulo onau atau gulo melako sikit. Kalau tak ado, pakai yo gulo meghah biaso. Tak pun kalau payah bonar, pakai yo gulo putih nun. Tapi jangan lak cubo pakai gulo-gulo. Kang kono penampa jopun sedas... mada muko. Kalau tak nak manih-manih, tak payah pakai gulo sobab lempeng ubi kayu ni buleh yo dicocah dongan samba ko, kari ko; apo-apo yo lah yang teghingin dek tokak.  Bahan lain yang perlu ado, kelapo paghut. Ambik yang putih eh. Nak sikit yo sobab nak bagi lomak-lomak sikit. Garam agak-agak la kan...



Alat Paghut Kelapo/Ubi Kayu,
Banyak jua kek kodai Vietnam ni..

Cam mano nak buek? Apo nak start dulu? Ubi kayu kono la paghut dulu.  Samo ado nak pakai paghut tradisional ko (yang alumunium bogigi tu - foto) atau mesin paghut kelapo; dua-duo boleh. Janji jangan tergaha tangan kau... Kalau dah ghaso cukup kuantiti ubi kayu yang dipaghut tadi, kono pulak poghah keluar kanji pait eh tu. Cam mano nak buek? Ambik kain putih boghosih, agak-agak la saiz eh kan. Kendian, masuk an ubi kayu yang dah dipaghut tadi, dikopa-kopa dan porghah keluar air kanji ubi tu. Kalau tak buek macam ni pun tak apo cumo takut kot-kot ubi kayu tu ada ghaso pait eh.. Kendian, masuk an dalam bokeh untuk digaul an dongan gulo. Lopeh tu masuk an kelapo paghut pulak. Tu yo.. dah siap untuk digoreng. 


Lempeng Ubi Kayu

 Operasi selanjut eh,  paneh an kuali. Palit an atau gris kan kuali tu dongan minyak atau mentega. Cakap hal kuali ni, jangan pulak pakai kuali bosa bona atau kancah yang guno buek penganan (dodol) tu. Melampau tu. Silap-silap, dilompang eh dek atuk kau kang. Pakai yang kocik saiz-saiz dulang air tu yo. Kalau nak sonang, pakai yang leper, yang mamak buek ghuti canai tu. Kok kau jonis eh yang suko melangut kodai mamak, pinjam yo kojap daghi mamak tu... Bila dah agak-agak paneh sikit, kaut gaulan ubi kayu++ tadi tu dengan sonduk dan lotak ateh kuali. Dongan pantas, copek-copek lenyek gaulan tadi tu, jadi an dio lempeng. Balik-balik an lempeng tu ikut kesesuaian sampai masak. Tak lamo, 5-6 minit dah buleh angkek. Siap dah lempeng.. Apo laei?  


Oooo... air kupi O.. pasangan yang paling sesuai dongan lempeng ubi kayu..  Nak den ceghito jugak ko cam mano nak buek kupi O. Ngengado botul lah! Dah lah tu.. buek ar sendighi. Kalau maleh bebona, ngango mulut, masuk an kupi, masuk an gulo pas tu air... buek macam Mr Bean tu. Lantak kau lah!

Den nak makan dah ni... Lempeng Ubi Kayu cocah samba tumih dan Kupi O paneh.

Nak join ko??

Kali Pertamo Nak Mencubo



Masjid Bosar Somban



Semekom (assalamualaikum)... Den asal NS. Biaso la kan. Gayo bahaso pun dah tau kan, takkan bahaso jao lak... Den ni tak ponah laiee nak blog memblog ni, baghu nak mencubo. Dalam blog den ni den guna 2 bahaso yo. Bahaso Melayu Stended atau Bahaso Melayu botul dan Bahaso Omputih. Bahaso lain den tak ghoti. Mako eh, sapo-sapo nak join den alu-alukan amek. Bak kato oghang tuo-tuo, kocik tapak tangan, penampa abah den, den tadah an.  Eh.... apo lak penampa poie eh ni... maksud den, nyighu den tadah an.. Bukan stadium Paroi yo. Bosar bonar dan bunyi eh kang macam bangang la pulak.

Den sebona eh tak ado tujuan spesifik mongonai apo yang nak dibughark an atau diskas kato omputih... Semuo topik den nak kaver. Samado sosial ko, politik, sukan, hiburan, sastera, sains dan macam-mcam laie lah. Tompi, kalau buleh tak nak la mengato-ngato orghang lain lak kan, walau pun kojo mengato ni la yang paling sodap nak buek. Yo lah, kito tengok lah nanti cam mano..

So, cam tu la yo dulu sebagai pembuko kato.  Kang cakap banyak-banyak menyampah lak kaum.. See you soon.. Salam...