TIKET FINAL PIALO MALAYSIA 2011 - MAHA BONA KO??

      APO BONDO LAIEE LA NIHHH.. Pasal tiket Final Piala Malaysia... Heboh satu dunio, tiket maha la, FAM cokik daghah la... Siap tunjuk prasaan lagi tuh... Adohaiii , macam-macam peghangai..

      Mulo-mulo den pun macam maghah la jugak. Tapi dalam pado maso yang samo den ada pandangan yang bebezo jugak. Bukan jugak den 100% sokong FAM naikkan ghogo tiket... Den tengok, yang pertamo, Persatuan BolaSepak NS, bagi potongan, 50 ingit tingga 30. Yang dah boli boleh claim balik. Tompi mano yang boli sondighi, tak buleh la minta rebet tu.. Lopeh tu, pasukan Ganukite pulak, siap jua tiket dongan diskaun 50% lagi.  50 dah tingga 25 inggit.  Apo laie? Banyak dah kughang eh tu.. Kek Ganukite, siap ado lak yang jua balik 45 inggit. Hah, sekaghang ni, sapo yang hampeh?

     FAM sebona eh dah tau dah... kau bising la satu dunio, tiket akan abih yo... Memang pun, dah langsai!!!... Sapo-sapo, yang lain-lain la kan, yang ondakkan tiket, ha kau baya la dengan ghogo yang tolah ditotap an tu. Tak payah bising-bising la. Kau bilo omputih datang main bola kek Malaysia, dio oghang training pun kau sanggup baya nak tengok. Ni bilo pasukan mamat malaya, oghang kito sendighi yang naik main, banyak bona laa yang kau heboh an... APO BONDO LA..

   Kalau payah bona, kalau masih teghaso ghogo tu maha bona, jangan poie stadium, nonggok yo ke umah dopan TV tu ontok-ontok macam den. Pi bancuh kupi pokat, judu an dongan biskut lutut, pakai kain pelekat dengan T-Shirt pagoda.. Hah, kau mengangkang la dopan TV kau tu... Sekughang-kughang eh... kalau replay, dapek yo kau tengok...

    Botul tak kato den ni? Tak botul? Ah lantak kau lah.....

Bola Lagi - NS vs Ganukite....Final Piala Malaysia 2011

     
       YABEDDABEDDUUU...!!!! Syabas la NS - masuk final Pialo Malaysia, kali ketigo ni boturut-turut sojak 2009.  Konsisten botul la kato kawan omputih den. Pomulaan kempen pasukan NS ni dulu, macam somput yo. Maso liga dulu, cubo ingat; main sekali, monang.  Lopeh tu bungkuih... Lopeh tu seri la pulak...Eh.. monang balik lak lopeh tu!!  Tup-tup... Wan Jamak pun bungkuih.... Monang-Kalah-Seri.. Tu la kojo eh sampai kesudah..... 


       Tompi, lain lak ceghito bilo masuk Pialo Malaysia. Cam masuk antu lak memasing eh.. Ko ado coach Azraai bawak sekali Jin Siam ko?.  Tak ado ghaso eh. Yang pasti semuo pemain NS tolah mompersombahkan permainan yang cukup mantap di sepanjang kempen, sampai masuk final Pialo Malaysia; dongan ponuh gayo sobab bagi 'tiket balik' Ganu kopado T-Team dongan duo gol lagi di Paroi; dongan poket yang agak kombung sobab persatuan bagi RM200K... tu lun monang laie tu. Kok monang nanti, kok la kan, maun eh saghat poket seluar baju dongan duit!!


     Tapi ni den nak boposan la kek sumo jurulatih, pegawai dan pemain-pemain NS; jangan mudah leko, jangan lupo dan jangan jobo (angkuh - den pun tak tau asal usul pokataan 'jobo' nih). Perjuangan masih ado laie 90 minit di Shah Alam. Kono prepare bobotul tu sobab; selain dari padang Stadium Shah Alam yang macam sawah kek kampung Acik den di Pilah, faktor-faktor ober-konpiden kolak buleh momakan diri.. Itu sobab eh kono mulo pikir strategi terbaik untuk mencaghi cagho macam mano pialo ni buleh bawak balik ko Somban...


     Den setakat bocakap yo la kan.... Macam yang ponah den cakap sebelun eh ni, cakap bebanyak kang, menyampah lak kaum... So, wahai pemain pasukan NS, jom kita gogar stadium Shah Alam.. Jom kita bajak padang tu... biar sonang oghang Ganukite menyomai bonih padi lopeh abih main... haha..


     Moh kito warga NS... ko Shah Alam pado 29 Oktober ni (Semayang Isya' dulu, mintak monang).


HOBEN JANG HOBEN.....

Bolasepak Sana Sini Sinun...

       Salam. Mak aiiii... Lamo botul la pulak den tak buek apo kat blog den ni. Ontah apo-apo. Angat-angat taik ayam  yo den nih, ontah apo-apo.  Tompi tak apo. Ni den mulo balik la nih. Menulih. Den nak mulo balik molalui bab sukan la kan. Apo laie kalau bukan bolasepak. Sukan no 1 dunio tompi negagho kito masih... ontah nombo beghapo agak eh... 148 ko... ko 128?  Masih laei above hundred... Apo la kan, apo yang susah bona nak sekughang-kughang eh lotak bawah seghatuih (100).  Banyak jurulatih silih boganti, daghi luar atau dalam negagho sendighi tompi tahap sukan bolasepak kito masih yo tak ke mano. Ado la nampak kan, peningkatan sikit. Tompi sikit bebonar. Pemain dah macam nak mampuih main. Cam tu yo kito. Mungkin agak eh dan sampai maso eh kono buek perubahan bosar kek pucuk pimpinan tu ha... kok dio orghang nak beghubah la kan... Kalau tak ondak, tak dapek la kito nak nolong eh laie..

       Malam duo haghi lopeh, den nengok la live MU vs MCity. Umanggg aiii, kono belasah MU 1-6. Den tengok player MU dibudak-budak an oleh player MCity. Sian. Ni kigho sejaghah paling memalukan la bagi kolab kayo tu sojak penubuhan eh.... Eleh... kalah sekali sekalo biaso la kan. Tompi, kalau kalah banyak bona macam tu, dah lain bona bumyi eh tu... Takkan la sobab soghang yang kono kad meghah, sampai 6 bijik kau sodokah an... Alahai.. APO BONDO EH NIH.....

Rasuah ko?.... Ko sobab an dek PM Malaysia yang tengok live? Tak ada kono mongono tu... Oghang bangang yo yang cakap cam tu...... Apo-apo pun, sian la jugak. Koghang tengok la muko Alex Fergie tu ha... dah macam muko baghu tetolan cuko gotah kobun abah den. Mencuko. Apo la nak kato laie... dah kalah teghimo yo la.....